Spennandi veiðileyfi í ágúst og september!

Nú virðist sá silfraði vera að mæta í Þjórsárdalinn, fyrsti laxinn veiddist á sunnudaginn og á laugardaginn veiddist 60 cm sjóbirtingur.

Vatnsstaðan er hindrunin hér, en það er einhver væta í kortunum og þá gæti laxinn gengið upp í Sandána, hér borgar sig að fylgjast með veðurspá og grípa daga í vefsölu þegar spáð er vætu.

Gljúfurá í Borgarfirði er á fínu róli, 81 lax er kominn í bók auk slatta af sjóbirting og urriða, miklu munar orðið um betra aðgengi niður að Ós, neðra svæðið er mun meira inn í veiðinni núna.

Yfir 500 laxar voru gengnir í gegnum teljara síðast þegar fréttir fengust úr teljara, það eru 3 vikur síðan og örugglega slatti bæst við.

Það eru 2 holl laus í Gljúfurá í sumar, besti tíminn framundan.

3 stangir í sjálfsmennsku í frábæru nýuppgerðu húsi.

Miðsvæðið er kynngimagnað svæði, þarna eru nokkrir af helstu stórlaxastöðum í Laxá í Aðaldal.

Fyrir utan frábæra urriðaveiði þá er þarna töluverð laxveiði og miðað við fréttir af Drottningunni þá er töluvert af laxi gengið í ána og því eftir miklu að slægjast, besti tíminn í ánni að ganga í hönd.

Eigum tvö holl eru laus á Miðsvæðinu sannkölluðum stórlaxatíma: 13-15 ágúst og 24-27 ágúst.  3 stanga svæði með mjög góðu húsi í sjálfsmennsku.

Reykjadalsáin kom ný í flóru SVFR í sumar, skemmtileg 2 stanga á í Borgarfirði með frábæru húsi.

Áin er síðsumarsá, besti tíminn er ágúst og september.

Það eru 2 holl laus í ágúst og fimm holl í sept, athugið að það þarf að kaupa báðar stangir saman.

Vatnsdalsá í Vatnsfirði hefur verið frekar róleg í sumar enda síðsumarsvæði í laxi.

Mikið er af sjóbleikju í neðri ánni og einnig hefur sést töluvert af laxi í ánni,mikið af fiski á ferðinni þarna á þessu svæði.

Nú er árnefndin búin að rafvæða húsið og setja upp hitakút í hús. Einnig er búið að byggja nýjan pall og gera húsið mjög huggulegt.

Það eru holl laus núna seinni part sumars, tilvalið að sameina veiðiferð og berjaferð vestur.