Árni Friðleifsson
Veiddi minn fyrsta lax 1978, þá tíu ára gamall og hef síðan nánast eytt öllum sumrum á Íslandi við stangveiðar. Hef verið leiðsögumaður á svæðum SVFR í tæp tuttugu ár. Jafnt með íslenska og erlenda veiðimenn. Það er ótrúlega gefandi að aðstoða veiðimenn og upplifa sanna gleði þegar góður veiðidagur er að kveldi kominn. Langá á Mýrum og Haukadalsá hafa verið minn heimavöllur síðustu árin. Reynsla, gæði og gaman er það sem ég stend fyrir.
Árni Kristinn Skúlason
Ég hef áralanga reynslu af leiðsögn og finnst fátt skemmtilegra en að vera við árbakkann að aðstoða veiðimenn. Ég hef leiðsagt í ám og vötnum um land allt en undanfarin ár hef ég verið mest í ársvæðunum næst höfuðborgarsvæðinu. Ég er gæddur þeim hæfileika að geta lesið vatn auðveldlega og hefur það reynst vel þegar kemur að breyttum aðstæðum. Ég vinn á skrifstofu SVFR og hef gert það síðan 2019 með smá hléum.
Georg Andersen
Ég byrjaði að veiða lax árið 1979 þá 9 ára og hef verið að síðan. Byrjaði að veiða í Langá árið 2007 og hef verið við bakka Langá öll sumur síðan fyrst sem veiðimaður og síðar sem bæði veiðimaður og leiðsögumaður. Ég þekki ánna mjög vel á öllum tímum sumarsins og legg mikið upp úr því að veiðimaðurinn fái eins góða upplifun og aðstæður geta gefið hverju sinni. Veiði er ástríða og eitthvað sem er mjög gaman að geta gefið og deilt með öðrum
Helga Gísladóttir
Ég hef verið með veiðidellu frá því að ég man eftir mér enda alin upp á bökkum Þjórsár. Veit ekkert betra en að vera við veiðar hvort sem er við straumvatn eða stöðuvatn, hvort sem ég sjálf er að veiða eða vera leiðsegja öðrum. Veturinn er nýttur í að hnýta fyrir komandi tímabil. Ekkert eins skemmtilegt en að taka fisk á sína eigin flugu tala ekki um ef maður hefur hannað hana líka. Langá og Laxá í Laxárdal eru í miklu uppáhaldi.
Hjörleifur Steinarsson
Ég hef verið með veiðistöng í hendi í síðan ég man eftir mér sem smápolli.. Hef verið leiðsögumaður í bráðum 20 ár, veiði mikið á urriðasvæðunum fyrir norðan bæði Laxárdal og Mývatnssveit. Hef leiðsagt í mörgum ám á Íslandi og hef ansi mikla veiðireynslu. Mitt mottó í leiðsögn er að kúnnanum líði vel og fái bestu mögulegu upplifun af vatnasvæðinu sem hann er að veiða. Hef mjög gaman af því að leiðbeina fólki með veiðiaðferðir og fluguköst, þetta þarf allt að spila saman til að gera túrinn skemmtilegan.
Karl Lúðvíksson
Ég hef verið með flugustöng í höndunum síðan ég var 10 ára og hef ekki sleppt henni síðan. Ég byrjaði í veiðileiðsögn rétt eftir tvítugt og hef verið í því síðan með einhverjum hléum. 2015-2019 var ég staðarhaldari í Langá á Mýrum ásamt því að gæda flesta daga tímabilsins við ánna. Ég veiði bæði lax og silung þar sem mér finnst þetta mjög ólík veiði en báðar jafn skemmtilegar. Það kemur engum á óvart sem þekkir mig að heyra að mínar taugar liggja með Langá sem ég hef veitt við síðan 1977 með afa mínum heitnum. Í henni tók ég maríulaxinn og þarna hef ég átt mörg af mínum bestu augnablikum í veiði. Veiði snýst um augnablik, góðan félagsskap, náttúruna og að ganga vel um árnar okkar svo komandi kynslóðir fái að njóta þeirra líka.
Magnús Stefánsson
Ég er með veiðidellu á háu stigi og elska fátt meira en að vera við veiðar, hvort sem ég er að veiða sjálfur eða leiðsegja. Ég byrjaði að veiða á flugustöng 7 ára og fékk minn fyrsta lax fljótlega eftir það. Ég sit í fræðslunefnd SVFR þar sem að ef ég er ekki á veiðum elska ég að fræðast og tala við aðra um veiði. Langá er mín uppáhalds á og veit fátt betra en slökun á fjallinu.
Ísarr Edwins
Veiðar eru mín ástríða og er ég búin að vera að veiða síðan ég var borin í barna vagni niður í Rauðagíg í Veiðivötnum 6 mánaða gamall. Á sumrin geri ég lítið annað en veiða, bæði silung og lax. Ég er búin að vera í veiði leiðsögn í nokkur ár en síðastliðin tvö ár einungis í Langá. Það að vera við ánna í þessu einstaka umhverfi og að aðstoða veiði menn/konur að lesa ánna og sýna þeim hvar og hvernig best væri að fá töku, finnst mér ótrúlega gefandi og geri mitt besta til að þau sem hjá mér eru njóti veiðanna og tímanns við ánna eins vel og mögulegt er. Ég hef gaman af lífinu og stunda snjóbretti í Evrópu á veturnar en Ísland og veiðarnar eiga hug minn og hjarta á sumrin.
Ragnar Ingi Danner
Raggi er líffræðingur og ástríðuveiðimaður. hann fylgist mikið með lífríkinu í kring og nýtir sér það í fluguvalinu. Hann veiðir aðallega á flugu en er liðtækur á spúnastönginni. Raggi er formaður árnefndar og eyðir miklum tíma við Brúará og fylgist því vel með hvar fiskurinn heldur sig á hverjum tíma.
Rögnvaldur Örn Jónsson
Ég hef verið leiðsögumaður hjá Stangveiðifélagi Reykjavíkur í mjög mörg ár. Einnig hef ég veitt öll svæði félagsins og þekki þau öll afar vel. Hef mest verið að vinna við leiðsögn í Langá hin síðustu ár þar sem það er mín uppáhaldsveiðiá og þekki ég þar alla merkta sem og ómerkta veiðistaði sem leynast víða. Mitt markmið í leiðsögn er að mínir viðskiptavinir njóti veiðiferðarinnar sem allra best og njóti þess að vera úti í náttúrinni að kasta fyrir fisk í fallegum strengjum og breiðum.
Sveinn Ævarsson
Ég á margar góðar minningar frá minni æsku sem tengist veiði fyrst með kaststöng og seinna með flugu. Sem drengur var ég meira og minna öll sumur í sumarbústað foreldar minna við Langá, ég fylgdist áhugasamur með veiðimönnunum sem reyndu við laxinn í ánni og sat of löngum stundum við bakkann og fylgdist með, bæði veiðinni og lífinu í ánni. Ég hef stunda veiðar bæði á silung og lax nánast alla mína ævi, bæði í ám og vötnum. Ég hef mikla ánægju af veiðunum, finnst róandi að „standa út í“ og reyna við bráðina, finnst ekki aðalmálið að ná fiski heldur að vera og njóta í íslenskri náttúru, mér finnst félagsskapurinn skipta miklu máli, ekkert er betra en veiðiferð í góðra vina hópi. Enda er það þannig að úr öllum þessum litlu augnablikum er eilífðin gerð.
Valdimar Hilmarsson
Ég hef veitt frá því ég man eftir mér og veit ekkert betra en að vera við árbakkann hvort sem ég er að veiða sjálfur eða leiðbeina öðrum veiðimönnum. Ég hef verið leiðsögumaður fyrir SVFR við Langá á Mýrum í laxveiði og við Laxá í Laxárdal í silungaveiði. Ég hef mikla þekkingu á þessum ársvæðum og hef því takmarkað leiðsögn að mestu við þessi tvö svæði. Markmið mitt í leiðsögninni er að hámarka jákvæða upplifun veiðimannsins og kappkosta við að skapa dýrmætar og skemmtilegar minningar.
