Stjórn Stangaveiðifélags Reykjavíkur

Í stjórn SVFR sitja sjö stjórnarmenn hverju sinni. Formaður stjórnar er kosinn til eins árs á aðalfundi félagsins. Aðalfundur hefur æðsta úrskurðunarvald í málefnum félagsins en þar er einnig kosið um þrjú sæti stjórnarmanna hverju sinni. Aðrir stjórnarmenn en formaður eru kjörnir til tveggja ára. Ný stjórn skiptir með sér störfum á fyrsta stjórnarfundi eftir aðalfund.

Viljirðu hafa samband við stjórn SVFR, sendu tölvupóst á [email protected]

Stjórnarformaður

Jón Þór Ólason

Jón Þór er formaður SVFR og Þingeyingur í húð og hár. Forfallinn laxveiðimaður sem sinnir lögfræðistörfum utan veiðitímabilsins. Jón Þór hefur verið virkur í störfum fyrir SVFR í gegnum árin og starfað sem leiðsögumaður á svæðum félagsins til fjölda ára. Honum er umhugað um SVFR og vill sjá veg þess sem mestan og vill styrkja félagslega þáttinn í félaginu sem mest og stuðla að stangaveiði sem almennings og fjölskylduíþróttar. Jón Þór er ötull talsmaður gegn laxeldi í sjó og vill berjast gegn því með kjafti og klóm.

Varaformaður

Ragnheiður Thorsteinsson

Ragga eins og hún er oftast kölluð, kom inn í stjórn eftir aðalfund 2019, eftir 2ja ára fjarveru. Ragga sat í stjórn félagsins frá 2011 til 2017 og hefur þar á undan setið í skemmtinefnd félagsins. Hennar heimavöllur er Langáin, þar sem hún veiðir flesta undir borðið.

Gjaldkeri

Halldór Jörgensson

Ritari

Hrannar Pétursson

Hrannar er fæddur og uppalinn á Húsavík og veiðimaður fram í fingurgóma eftir að hafa orðið veiðidellunni að bráð fyrir margt löngu síðan. Hann býr yfir gífurlegri reynslu af markaðs- og kynningarstarfi og hefur brennandi áhuga á að byggja á grunngildum SVFR og félagsmönnum til framtíðar með það að leiðarljósi að efla félagsstarf SVFR.

Meðstjórnandi

Helga Jónsdóttir

Helga Jónsdóttir er viðskiptafræðingur og starfa við Innra eftirlit hjá Högum. Auk veiðinnar stunda ég golf, skíði og raun alla útivist en stefnan er tekin á hálfan Járnkall (e. Iron Man) á Ítalíu í haust. Veiðiáhuginn fer vaxandi og draumurinn um að vera sjálfstæð veiðikona færist nær. Mín uppáhaldsveiðiá er Langá. Ég tek áskorunum fagnandi og hugsa í lausnum.

Meðstjórnandi

Lára Kristjánsdóttir

Lára er Snæfellingur í húð og hár, fædd og uppalin í Ólafsvík. Lára hefur lengi tekið þátt í starfi Stangaveiðifélags Reykjavíkur og starfað í árnefnd Andakílsár undanfarin 15 ár. Lára er reynd veiðikona og hefur veitt víða. Þá hefur hún unnið við veiðileiðsögn laxveiðimanna, ein fárra kvenna á Íslandi. Lára segir þessi verkefni hafa fært sér bæði reynslu og þekkingu sem hún vilji deila með félaginu.

Meðstjórnandi

Trausti Hafliðason

Trausti bjó í Mosfellssveit á fyrstu árum ævinnar en flutti ungur til Reykjavíkur. Veiðibakterían gerði fyrst vart við sig þegar hann var í sveit í Mývatnssveit á níunda áratugnum. Trausti hefur í gegnum árin verið virkur í félagsstarfi Stangaveiðifélagsins. Hefur hann meðal annars setið í árnefnd Langár í 8-9 ár og verið í ritnefnd Veiðimannsins í sex ár. Langá og Haukadalsá eru í sérstöku uppáhaldi hjá Trausta, sem hefur starfað í blaðamennsku í rúma tvo áratugi og er í dag ritstjóri Viðskiptablaðsins.