Frá 64 þús.
Miðá í Dölum
Miðá í Dölum rennur niður Miðdali og er frekar hefðbundin dragá. Helsta veiðin er lax en einnig veiðist talsvert af sjóbleikju, veitt er á þrjár stangir allt tímabilið. Aðgengi að ánni er til fyrirmyndar og hentar hún því fjölskyldum afar vel. Veiðisvæðið samanstendur af Miðá og Tunguá sem renna saman stutt fyrir neðan veiðihús.
Miðgarður
Miðá er afar aðgengileg, þægileg og sérlega fjölskylduvæn enda hafa margir ungir veiðimenn stigið sín fyrstu skref í stangveiði í ánni. Á staðnum er vel útbúið veiðihús með eldhúsi, salerni með sturtu, huggulegri stofu og þremur svefnherbergjum sem hvert um sig er með tveimur 90x200 cm. uppábúnum rúmum.
Á pallinum er glænýr heitur pottur sem verður vígður á næstum dögum (júlí 2023) og gasgrill. Í kringum húsið er afgirtur garður sem tilvalið er að tjalda í eða setja upp einhvers konar ferðavagna hugnist gestum það. Veiðimenn skulu tæma heita pottinn og þrífa og gæta þess að grillið sé snyrtilegt og tilbúið fyrir næsta holl.
Veiðimenn eru vinsamlegast beðnir um að flokka allt rusl í þar til gerðar tunnur, staðsettar í húsi, og tæma í tunnurnar fyrir utan. Gott er að hafa meðferðis auka poka, álpappír, krydd og olíur en á staðnum er salernis- og eldhúspappír, handsápa, uppþvottalögur, tuskur og viskustykki auk tveggja gaskúta fyrir grillið.
Fólksbílafært er að húsinu og lyklarnir eru í sérstöku lyklaboxi sem opnast með kóða. Athugið að greiða þarf þrifagjald í húsi á brottfarardegi.
Að lokum viljum við benda veiðimönnum á áhugaverði staði í Miðdalnum eins og t.d. Rjómabúið Erpsstaði þar sem nóg er til af ostum og ís, börnin geta leikið sér og fengið að skoða dýrin á bænum. Sælureiturinn Árblik, félagsheimilið fyrir ofan veiðihúsið, er einnig með opið í sumar en þar er rekið kaffihús og ýmis konar handverk til sölu ásamt kjöti beint frá býli.