Áin er um 7 km löng og rennur í bugðum og sveigjum til vesturs og fellur til sjávar í Blikastaðakró. Við Vesturlandsveg skiptir áin stundum um nafn og heitir þar fyrir neðan Korpúlfsstaðaá eða Korpa. Úlfarsá er yfirleitt um 10 metra breið, tær og ekki straumþung. Mikil vinna hefur farið í að laga til og búa til veiðistaði. Þessar lagfæringar á ánni hafa gert hana enn aðgengilegri til fluguveiða. Áin er algjörlega sjálfbær og engar seiðasleppingar fara þar fram. Kvóti er einn lax á dag á hverja dagsstöng.

Athugið að veiðimönnum ber að taka hreistursýni af hverjum veiddum fiski sem hirtur er, óski veiðivörður þess.

Á veiðitímabilinu 2025 veiddust 148 laxar á tvær stangir. Mikill sjóbirtingsgangur er í ánni og geta fiskarnir verið mjög vænir. Við Stífluna er myndavélateljari og er skemmtilegt að fylgjast með fiskunum sem þar ganga um.

Í Korpu er heimilt að veiða bæði á flugu og maðk. Neðri hluti árinnar hentar afar vel til maðkveiða, en svæðið fyrir ofan stífluna hentar mun betur til fluguveiða.

Meðal bestu veiðistaða í Korpu eru Bliki, Stíflan, Sjávarfoss, Stokkar, Túnhylur og Þjófahylur. Aðgengi að veiðistöðum er mjög gott.

Leiðsögumenn SVFR eru veiðimenn með mikla og langa veiðireynslu og eru valdir af kostgæfni. Með leiðsögn verður veiðin markvissari, tíminn nýtist betur, og oftar en ekki ánægjulegri. Leiðsögumenn okkar upplýsa veiðimenn um bestu veiðistaðina í ánni, búnaðinn og veiðitækni.

  Markvissari veiði

  Fagleg ráðgjöf

Almennar

Vinsamlegast kynnið ykkur veiðireglurnar og virðið þær. Brot á veiðireglum varða fyrirvaralausum brottrekstri úr ánni, upptöku afla og veiðafæra ásamt öðrum viðurlögum eftir því sem við á.

Gangið vel um veiðisvæðið, valdið ekki jarðraski og hirðið allt rusl. Sýnið náttúrunni virðingu og keyrið ekki utanvega. Allan afla ber að skrá í veiðibók.

Sjá einnig almennar veiðireglur SVFR