Veiðisvæðið í Sandá er fjölbreytt og stórbrotið. Áin heldur vel vatni og afar sjaldgæft er að vatnsleysi hrjái veiðimenn. Þvert á móti skapar lágt vatn í ánni skemmtileg skilyrði með fleiri kjörnum gáruhnútsveiðistöðum. Áin er fiskgeng um 12 kílómetra upp að Sandárfossi. Sandá hentar einstaklega vel til fluguveiða og má segja að sumir staðir séu hannaðir fyrir veiðimenn af náttúrunnar hendi. Meðalveiði síðustu átta ára eru 302 laxar en sumarið 2023 veiddust 336 laxar í Sandá.

Sama gildir með Sandá og aðrar stærri ár, laxinn liggur oft nær heldur en mann grunar og er um að gera að byrja að kasta áður en vaðið er út. Fiskurinn er afar tökuglaður í yfirborði og eru gárutúbur mikið notaðar þarna, þó að áin sé köld þarf ekki að sökkva flugunni til að fá laxinn til að taka. Flugur frá stærð 8-16 reynast veiðimönnum afar vel.

Aðgengi er misgott á veiðistaði og er mikilvægt að veiðimenn gæti varúðar í gljúfrunum. Neðri svæðin eru mun aðgengilegri og er aðgengi oftast afar gott þar.

Sandá er algjör stórlaxaá en á hverju ári veiðast þar margir tveggja ára laxar. Áin er þekkt fyrir sinn stórvaxna og sterka laxastofn og hafa fjölmargir 100cm+ fiskar veiðst þar í gegnum árin.

Tillaga að svæðaskiptingu
1 - Sandárfoss - Hringur
2 - Þriggjalaxahylur efri - Fljótið
3 - Hæðarþúfuhylur - Bjarnadalshylur
4 - Strangur - Ósbreiða

Leiðsögumenn SVFR eru veiðimenn með mikla og langa veiðireynslu og eru valdir af kostgæfni. Með leiðsögn verður veiðin markvissari, tíminn nýtist betur, og oftar en ekki ánægjulegri. Leiðsögumenn okkar upplýsa veiðimenn um bestu veiðistaðina í ánni, búnaðinn og veiðitækni.

  Markvissari veiði

  Fagleg ráðgjöf