Laxá í Aðaldal er ein frjósamasta á landsins. Miðsvæðið samanstendur af veiðistöðum fyrir landi jarðanna Jarlsstaða, Hjarðarhaga, Tjarnar og núna Ytra Fjalls líka.

Merktir veiðistaðir eru um 30 talsins, en í raun má líta á svæðið sem einn samfelldan veiðistað fyrir þá sem sækjast bæði eftir laxi og urriða. Fjölbreytnin er gríðarleg og fá svæði, ef nokkur, bjóða upp á jafn fjölbreytt úrval veiðistaða, að fossaveiði undanskilinni.

Aðgengi er frábært þar sem hægt er að aka að öllum veiðistöðum. Margir veiðimenn þekkja nöfn helstu laxastaðanna enda eru á svæðinu fornfrægir stórlaxastaðir á borð við Óseyri, Dýjaveitur, Breiðeyri, Símastreng og Tjarnarhólmaflúð.

Helstu urriðastaðirnir eru Höskuldsvík, Dýjaveitur og Kraunapollar. Urriðaveiðin er almennt best í maí og fram yfir miðjan júní. Laxveiðin fer svo fyrir alvöru af stað um 20. júlí og er septembermánuður oft sá gjöfulasti.

Skráningu á veiði árið 2025 var ábótavant, en talið er að um 50 laxar og 250 urriðar hafi veiðst. Meðallengd skráðra urriða var 54 cm og meðallengd laxa 73 cm. Stærstu fiskarnir sem skráðir voru mældust 70 cm urriði og 101 cm lax.

Veiðitímabilið er frá 1. maí til 20. september. Veiðimenn ákveða sjálfir hvenær þeir veiða, en veiðitími er að hámarki 12 klukkustundir á dag á milli kl. 07:00 og 24:00.

Innritun í veiðihúsið er frá kl. 15:00 á komudegi og við brottför skal húsið hafa verið rýmt eigi síðar en kl. 13:00.